22nd December 2009

 

Zanlai a ni ruai tawh. Bang sanga kan hun vawngtu pawhin dar 1 a kawk der tawh mai. Khawhar hnem leh lung ti muang, ral lehlam Sahuan hluia, tawngtai thawm pawh areh thap tawh a lawm. Mahse kei erawh chu mutchhuakin min kiansan ang tulh tulh a. Ka lehkha zirna dawhkan rauhsanin ka thinlung thawnthu ruangam din tur chuan ka khawl thluak nei lamah chuan ka insuan chho a. Lungngaihna Hapta hmang mek tute suangtuahna hre lek lovin hlimna mak tak nen Thim Lalna zan thim chhah tak mai chu ka hmang liam mek chu anih hi.

A mak ani ti raw?  Chi leh kuang kan ni lo a, kan inhnaihna ber chu Adama thlah kanni leh Mizo kanni tih chauh hi a ni. Mahse, engtizia khawvel mite lungngaihna zawng zawng hnawt tiau vek thei khawp hlimna nangin min hlan tak mai hi. A ropui a, a mak a, sawifiah dawn ila Aizawl atanga Shillong thleng daih hi chu sawi tur ka nei ngei ang le. Thu tawite, mahse awmze nei tak mai, thukhuh tak mai a min hrilh lai khan thlarau khawvela cheng ni maiin ka inhria a sin. Awm ngaihna ka hre lova, awmdan tur lah ka thiam hek lo. Ka ringhlel ngai lo che a, nang ringhlel nih chu hremhmun tlakna tham sualah ngai mahila, kha thil khan min ti ringhlel lek lek che asin. Ka lawm avanga thenawmte mu tui lai an harh lo kha chu an vannei ngawt mai.

Ni e, rin ngam ahar thin reng a ni. I chan ka hriatpui che a. Hmangaihna lamtluang bumboh tak I zawh chho tih pawh hai lotute zinga mi ka ni asin. Min ringhlel bik loving ti raw. Mahse hei hi hre reng la ka ti thin a sin. “ Hmangaih tamtak I lo nei tawh ani mai thei, I hmangaih hmasa ber ka ni lo a ni mai thei, I heh duhawm lo nuihpuitu hmasa ber ka ni lo mai thei, tlangval dar engzat chiah nge I kuah tawh tihlam ka ngaihtuah hek lo. Ka ngaihtuah ber zawk chu heng zawng zawngah hian a tawp ber leh tar kun thlenga nangmah neitu ka nih chuan ka lawm em em ang”

Thihna hlimkawr ruam ka zawh laiin, I kuta vawn tlat ka duh ang. Ka hlimni ah ka kianga awm tur leh ka lungaihna ni a ka tahna mittui min hruk sak turin tumah ka duh lo. Nang chauh lo chu. Khawvel hausakna leh ropuina ala chuai dawn ani tih chu nang pawhin I hai bik lovang. Pangpar mawite pawh chuaiin vaivutah kan kir leh dawn tih a chiang ang bawk hian nang ka 888888888 che hi chiang se ka duh a ni.

I pual liau liau hian vanram sak theih se chuan keima kutchhuak ngei ka thlang ang. Nui suh. A harsa dawn tih chu ka hria a lawm. Hneh thei ka ni tih ka inhai lo. Ka chakber lova ka fing ber bawk hek lo. Mahse nang ka kianga I awm tlat chuan..... Khawvelin min do mahse, ka tlawm ngai lovang. Engkim mai hi ka tan a mawi thar a. Kawtkaia lungtum mai mai pawh mi hriatlohin kan nuih ru var var ta mai. I hmel hmuh hlan nghakhlel em emin ka huhurh ru bawk si. Engtia awm tur nge ka hre thiam lo. Naupangchhia ang mai a awm chu tiin zahthlak ti ngawt dawn ila. Naupang thil thar lawm aiin ka ropui chuang bik si lo.

Mak ka ti tawp thei lo. Engtik nge a hun ka hre chiah ta love. Ka beisei ngam loh, ralkhata I hmel thlir mai pawh lo lungawipui thintu kha min duhthu min hrilh ta mai a maw???? Ka mumang ni lo hram se ka va ti eeeeem?? A nilo chu ani anga, lum leh vawt ka a hre tlat. Ka thihni thlenga ka tana rimawi ber a ni fovang. A chhan chu maw, kalsan nih hrehawmzia kan sawi a, inngaihbel tur zawnga kan buai laite kha. Ka rilru chhungrilah chuan lainatna leh hmangaihna chu a lo piangthar leh thin asin. Keichuan kalsan che hi ka duh lova, ka kianga awm reng turin ka duh ngawih ngawih che a, thihna in kan mit a chhin hun lo thlenni thlengin I kut nem tak vuan chunga thlahliam theih che hi ka duhthusam leh ka suangtuahna ani fo a sin.

Hmu reng chung si che hian ka ngai che a. I aw hre pha reng chung hian hriat reng ka chak thin. Tlaini tla turin kawl a chhun sen phut mai hi lunglen hun niin an sawi thin a, zan thla engin lung a tihlen zia pawh hahipin an sawi thin. Chung zawng zawng dikzia temchhin theia min siam ringawt pawh hi ka tan chuan damchhan tlak a ni. Ka thlan lunga ziah atan hian engthu nge ka duh ber tih min zawt ta se la. Ka chhungte’n min ngaih thu aichuan ka hmangaih thu che hi ka thlang ngei ang. Tin, min vuinia an thusawi pawh ka felna leh thatna, ka thiltih thatchhunte aichuan nang ka hmangaih thu che hi sawi turin ka thlang zawk ngei ang.

Hun rei lote a tan ka ti hauh lo che tih hi I hriat chhuah hunah chuan lawm a avangin I biagah mittui a luang lo a nih chuan I hmangaihna kha I enfiah zawk a tul hialin ka ring a sin. Ih maw, Duhtak, I sakruang leh hlimthla mithla chungin laikhum ka bel mai tanga e. Ka tan ni chhinchhiah tlak… Mangtha le..

Losing Identity

       Its My life   tih thum dut paha Chite luikam vela thirchhe zawn leh daih chu Zawhdawra suktin tluk chauh a thil inhmeh lo a ni. Tin, Chal a khi phawk ang tih hlauawm khawp a Bike a ramhuai speed a leu vel  chunga mi vawkchaw bel lo bunruah leh  ngawt thin pawh hi thil intuha lo tak a ni. 

Chhei raw.. Zuapa ahrang e...!!!!

    I thai leh hraite tana thlamuanna ban rinawm i ni dawn emaw tih laiin Jeriko kulh ham chim tum ve ni awm fahrana i  rawlchhe zet mai nen engtizaizia a i chhungte i rum thaih chiam mai le. I sermon vankai chaw lo zet mai ngaihthlak hrehawmtih vangin i hraite lah chu annu pawnfen pawtthla dawn dawnin an infunkhawm ang tel tel a. ‘Di intawm ka thiam velo’ tia luhkapui per thumdup dupa i chhaithluk i nupui duhtak ngei pawhin ‘ Lem ang der thiam mi u’ tih melh a melh chung chein kil khatah Anticipatory Bail dil tum dinin a din khurh dur dur mai tawh kha. Harh teh,  Inngaihtlawmna leh thuhnuairawlhna a khatte thlah kalzel ini tih hi manghilh lo la,  i hmelma dik tak do turin lo penchhuak zawk teh.
Chhuanawm lengi………
Oriflame Product atanga Tanakha  chena lo inpenparhpui tawhtu, tlangvalte tawte lo tisai hlawk hlawk a, mahnia Singapore khawpuia lengvel thei  khawp a chhuanawm kha tukina in ina ka lo kal khan chilthli nen I lo la invawmvum nasa mai a, I chhungte’n kaihthawh an tum thawm che khan ka lungphu thalo a ti chhuak ang tih ka hlauh a avangin ngawirengin ka relhsan ta che a nih kha. Ih maw.. ‘hnalak nat vanglai pawh a vartiana buh hak  lawk a, eirawngbawl paha buh deng thin; nitla vanvuai a lawmte bunpui a, vawkchaw mei vil pah a lakai a, lenghawnar khuan nghak thinte taksa kha liam tawh mahse an thisen kha nangmahah khan a la famkim tih erawh i theihnghilh ka duh love.
Zam ngailo vala tang ta che…
    Rinawmna leh Intodelhna nun lo champion puitute  thlah kalzel ni reng si khan engtizia a mi puanpho i sengkhalh tak dun dun mai le..Khawtlang thlamuan thintu tlangvalte khan khawtlang i ti ralti zo anti hriat hi chuan awih har ka ti thin. I ngaihtuah hah ngai hauhlova Company-te’n Mobile phone leh Bike an chhawp chhuahsak hnu che hian Zonunzemawi i hloh zota nge, Zonunzemawi kan mangtha hi a hun tawh tih hian ngaihtuahna a ti thui khawp mai. Thola, tunge i nih hria la, i tihtur dik tak ti ta che.

            Hawh u, kan boral hma hian i dinthar leh ang u..

THANA TE NUPA

  

-17^th May 2004

          Nupa theuh theuh hia lo inanloh theihin fate kan enkawl dan pawh hi a inperhsan thei khawp mai. Nu leh pain fate kan enkawl dan hian an hmakhua pawh nasa takin a hril niin alang. Mi nuleh pate’n an fate lehkha thiam leh khawtlang leh chhungaw tana chhenfakawm tak tak a an chhuah laiin kan Thanate nupa erawh hi chuan khua an tivar lovin mang an ti ang ngawt mai. An fate hetiang em em a tawmkailo leh khawtlang timualphotu a an tang fo mai hi ngaihtuah hi chuan Thanate nupa hi engemaw chen chu dem loh theih pawh anni lo. An nunphung tlangpui hi lo thlir la, a chiang kuar mai dawn a ni.

          Thanate nupa hi nula leh tlangval an nih lai pawh a mite’n ‘he mite pahnih em em hi chu an inhmangaih hmel bik mang e’ an tih tur khawpa in zui ngun leh khawlaiah pawh chhun eng zah map lova inkuahriala kal thin annih vei nen le; an inneiha, fate an neih hnu hian ui leh kel thlun pawl hang chauh anni ta hi chu a mak thlawt a ni. An fate hmuh lai leh hriatlai pawh thlu hauh lovin an inhau bur reg mai a.Lungrual taka fate enkawldunte chu an tan chuan Mt Everest tlang lawn chhuah tluk zet a harsa a ni.Hetiang annih vang hi a ni tehchek ang chu an fate’n nu leh pa a I a khawlai an ngainat zawk tlatni. Khawlaiah lah hian thiltha han zirchhuah tur hi a  awm mawlh si lo.

          Fate enkawl kawngah an ngaihdan hi a inkalh tlat a, tuboh pawh a chhut hawn ruallohin a inkalh nghet tlat a ni. An fate lehkhzir han awmpuia an thiamloh han hrilhte chu an taimakna piahlam thil a ni tlat. Chute a hnekin an lehkhazir kan ti buai ange ti niawm fahran hian Pi Kungi in hnuai berah an inlhekhaden san daih mai thin. A nupa a an tan dun hian man thei deuhin an in hre lehnghal. Zanah lenloh atha tithe chu an fate hrilh lo bik anni hleinem. Electric eng thim ngun tluk zetin an hrilh ngun vet ho a sin. Mahse amahni berin chhuah an thulh chuanloh avangin an fatepawhin a nzilhnate chu engtehualah ngaihsak lovin an nu leh pate lenbo hnuah an liamve nghal zat ze l a ni. Chhungkua a inkawm leh nuih ho dar darte chu an chem Kallohna lam a ni tlat.

          Miin an fate thatlohna leh diklohna han hrilh se ‘ min er leh lutuk tiin she ngamin tuang an lo din a. Mahse mi fate diklohna leh thatlohnate chu inthlahrung hauh lovin an tlangau pui leh bawng bawng lawi si. An fate an chhan hlur mai bawk si. Hemi hre ran hian an fate pawhin thiante zinga kawlhrawng leh tawrhhlelhawm pawl anni chho ta reng a ni. An fate sual leh dilohna a h midang mawhchhiat tur an zawngchamchi a. mahni inenfiah tum hawt lo hian an thiante zirloh leh hruaisualah an puh thlu hram thin.

          Hun dang chu sawiloh Pathianniah tak ngial pawh an inkhawm peihlo nupa a ,Mahse an fate chu inkhawm turin an tir antir leh lawi si. An fate lah chuan nu leh pa ber inkhawm peih ta lo chu sunhlu kungah theidang rahtir lovin inkhawm an han ngiahthah venghal  ngawt a. Khua a var lo hlawm the ania. Mahse Thanate nupa hian inkhawm peihlo viau e ti lo chuan Pathian ah chuan an inmghat lutuk leh tlat si. Fanau rochante chu a petu Pathian hnenah a enkawl a tan hnutchhiahin an theuleu san zaih thin.

          Mahni inchhunga hlimhmel pu ngailo leh vin khur khur kha khawlaiah thiante zingah erawhchuan a ka pawh zen ila min seh loving tih tur ani leh tlat si. An inah te chuan Hlimna awmlohna in tithe chu tar lem lo mahse hlimna hmuh tur a awmchuang si lo. An in te chu bungraw chhuak tharber berin a ngir khup mahse, an chaw eina thlengte chu China siamchangkang tak ni bawk mahse lungrual taka a chaw eiho nan an hmang chuang lo.

          An fate hnenah zuk leh hmuam leh ruihtheihthil thatlohziahrilh ve fo thin mahse anmahni ber ber nghei thei lovah an tanga, an zu a , an hmuam a an rui bawk thin. Thana tak phei hi chu kamding a ni bawk a. A thing rim pawh a nam hman meuh lo an tih chu. Zing thingpui aia a senchi lamp-ang pawh doctor chawh ni miah lova  arin na a rei tawh. Hetiang annih avang hian an fate pawhin an thusawi chu zawm tak tak tlakah an ruat saklo ni ngei tur a ni. A hmei apa in ruihhlo bawihah an tang chum chum mai a ni.

          An fate hi an duat em em maibawk a, vuak chu sawi loh hauh pawh an hau phallo a chha chu ania le,pathianin fanau rochan apekte lo zilh hau cho Mosia dan tluk zeta thiang lovah angai tlat thin .Anfate hnathawh hi aphallo bur a,an hah pal hang tih ahlau ni ngei tur ani.Zing thaawh bak hi chu thawh tir atum lem lo,Thana hi kamding ani bawka a eiruk zarah an nghei bik loving tih chu Thuthlungthar tluk zetin aring ve ani.Hetianga an enkawl choh vang hi aniang chu an fate puitlin theih der loh ni.Fate in hmangaihlo ti ila chuan hmai sen urh hian an hmangaih zia leh an tana anin pumpek zia chu Lunglei atanga Aizawl thleng pawh sawi tur an hr eve leh tlat ang

Hengte vang hian an then awm khawveng te chuan ngaih khatah ngaiin kan ngawih san tawh mai mai ani.Tih ngaihna tak pawh a awmlo.An chhungkua han ngaih tuah chang a kan ‘huiha’pui mai hi kan tih theih tawkah ngaiin thahnem ngai takin kan ‘huiha’ puta mai ani. Thante nupa chauh lo pawh hi hetianga fate enkawl hi kan tam awm tak asin.